Whe de lamp!
Meh sisteh in de dark
‘Cause current gone an’ cut
Ah have a little spark
But yuh feel dat daiz enough?
What ah single match go do
When all about pitch black
Ah go leave she in she stew
‘Cause one match cyah galavant
Ah have meh candle pack away
One sittin’ pretty on de ledge
But it well borin’ an’ it plain
Ah go let it sit right dere!
Mamah, what people go say?
Dey go talk meh to de ground
Let miss lady kilketay
Ah cyah help she one pound
Lawdee lawd, ah well forget
Torchlight store way in de back
But steups! Is vex ah vex!
It rustin an’ it crack
Meh flambeau doh have pretty dress
So ah shame to pass it down
Leave miss madam in she stress
Before meh business all in town
Leh meh lie down on meh bed
Leh meh take a chinkee nap
But is when yuh rest yuh head
Is when it have voice callin’ in de back
Who is dat outside, boy?
Leh meh go an’ check
Ay, ay, gyul is you?!
So yuh nearly break yuh neck?!
Walkin’ roun’ in de dark
Yuh bonx yuh toe ten times
An’ de pot leave ah mark
‘Cause yuh was hottin’ bush tea wid lime?
Now yuh head hot hot hot
Yuh doh know what to do
‘Cause yuh doh have no light
Yuh in monkey pants fuh true!
Well, sistren, what ah could give?
Ah cyah leave yuh frettin so
Ah just have some few lil’ tings
But they not so good, yuh know
Yuh say yuh wouldn’t decline?
De torchlight not so bruise
The candle and match is fine
All dat could use?!
Well ah learn something today
Ah learn meh lesson well
At last, deeray, deeray
Ah could read an’ ah could spell
Water more than flour
Is never no excuse
To leave your bredren sour
By neglect, which is abuse
Crappo smoke yuh pipe
Daiz not de way to think
If yuh feel dat daiz alright
Well yuh really need some licks
Monkey could break he back
But not me, not I, no Sah!
Ah have plenty pommerac
To give way to all all yuh!
Some place in de Book
Dey’s talk about a light
When everybody look
It supposed to be real bright
Small, medium, jumbo size
It doh matter what in han’
If is one thing … Doh hide!
Move wid de master plan!
All ah we is firefly
Lightin’ up de night
Dottin up de sky
In luminary flight
Look how I wax lyrical
Never knew ah had it so!
If ah flash a little bit
Is de more of me will glow
Like stars to de sky
So is we to dis dark world
It ain’t have no better sight
Dan when yuh lamp does burn!
Crick Crack
©NnekaEdwards2003
Meh sisteh in de dark
‘Cause current gone an’ cut
Ah have a little spark
But yuh feel dat daiz enough?
What ah single match go do
When all about pitch black
Ah go leave she in she stew
‘Cause one match cyah galavant
Ah have meh candle pack away
One sittin’ pretty on de ledge
But it well borin’ an’ it plain
Ah go let it sit right dere!
Mamah, what people go say?
Dey go talk meh to de ground
Let miss lady kilketay
Ah cyah help she one pound
Lawdee lawd, ah well forget
Torchlight store way in de back
But steups! Is vex ah vex!
It rustin an’ it crack
Meh flambeau doh have pretty dress
So ah shame to pass it down
Leave miss madam in she stress
Before meh business all in town
Leh meh lie down on meh bed
Leh meh take a chinkee nap
But is when yuh rest yuh head
Is when it have voice callin’ in de back
Who is dat outside, boy?
Leh meh go an’ check
Ay, ay, gyul is you?!
So yuh nearly break yuh neck?!
Walkin’ roun’ in de dark
Yuh bonx yuh toe ten times
An’ de pot leave ah mark
‘Cause yuh was hottin’ bush tea wid lime?
Now yuh head hot hot hot
Yuh doh know what to do
‘Cause yuh doh have no light
Yuh in monkey pants fuh true!
Well, sistren, what ah could give?
Ah cyah leave yuh frettin so
Ah just have some few lil’ tings
But they not so good, yuh know
Yuh say yuh wouldn’t decline?
De torchlight not so bruise
The candle and match is fine
All dat could use?!
Well ah learn something today
Ah learn meh lesson well
At last, deeray, deeray
Ah could read an’ ah could spell
Water more than flour
Is never no excuse
To leave your bredren sour
By neglect, which is abuse
Crappo smoke yuh pipe
Daiz not de way to think
If yuh feel dat daiz alright
Well yuh really need some licks
Monkey could break he back
But not me, not I, no Sah!
Ah have plenty pommerac
To give way to all all yuh!
Some place in de Book
Dey’s talk about a light
When everybody look
It supposed to be real bright
Small, medium, jumbo size
It doh matter what in han’
If is one thing … Doh hide!
Move wid de master plan!
All ah we is firefly
Lightin’ up de night
Dottin up de sky
In luminary flight
Look how I wax lyrical
Never knew ah had it so!
If ah flash a little bit
Is de more of me will glow
Like stars to de sky
So is we to dis dark world
It ain’t have no better sight
Dan when yuh lamp does burn!
Crick Crack
©NnekaEdwards2003
No comments:
Post a Comment